政情：食力簡出選上水受挫
新界二十七個鄉事委員會陸續完成換屆選舉，多個鄉委會都大洗牌。早前曾傳出有意出山爭做上水鄉委會主席嘅「食力簡」簡炳墀，前日確有參選上水鄉委會執委會改選。可惜嘅係，據聞簡Sir張名單只得十六票，被原主席侯志強名單四十四票擊敗，簡Sir入唔到執委會，自然爭主席嘅機會都無埋。
侯志強牙擦一番
侯志強尋日好高興對本報話：「選舉結果意料中事啦，如果連簡炳墀都贏唔到，仲使出來做嘢嘅？我哋做鄉郊事務向來講心唔講金嘅！」咁係咪證明侯主席有「食力」呢？點知侯主席話：「我係講實力嘅，唔係食力！」如果侯主席呢番說話畀簡Sir聽到，都咪話唔心傷。
我哋前晚已搵過簡Sir，但佢話自己瞓咗覺而掛線，尋晚再打多次畀佢，結果響響吓仲斷埋線添，想慰問吓佢都無機會囉！話畀大家知，稍後仲有幾個鄉委會改選，包括屯門鄉委會改選，相信又係連場好戲。