政情：肥仔明賞花大計泡湯
港人向來鍾情到日本旅遊，今次福島爆發核危機，唔少人嘅旅遊大計都泡湯，立會議員李華明亦係苦主之一。肥仔明原本諗住下月復活節到大阪賞櫻花，但一場核爆危機令佢焗住捱貴手續費兼縮短行程，轉玩新加坡。
唔單止咁，肥仔明嘅囡囡今年大學畢業，原本打算八月去日本參與為期一年嘅「工作假期」，仲未知能否成行。肥仔明話，佢囡囡向來熱愛日本文化，工作假期係難得嘅中日交流好機會，所以佢都唔會阻止囡囡去，但會叫囡囡留喺北海道等較安全嘅地方喎。
旅遊界議員謝偉俊（Paul）就向旅遊大計泡湯嘅港人推介，轉去新加坡或馬爾代夫旅遊，仲話一旦日本災情穩定落嚟，佢會率領旅遊業界嘅朋友到日本旅遊以示支持。阿Paul又話，佢同白韻琹都喜歡食日本菜，雖然日本食品面對核危機輻射威脅，但佢哋仍會食魚生，最多小心啲喎。