政情：IT豪嫌「新居」個芒落後
立法會今個暑假就會搬新屋，除咗地方大咗，新大樓嘅IT配備都升咗級。秘書處呢個星期就安排議員試用新系統，本身代表資訊科技界嘅譚偉豪（IT豪）就專登走去試吓，對新會議廳議員座位嘅電腦顯示螢幕好有意見，話螢幕冇多點觸控（Multi-touch）功能，做唔到好似iPhone同iPad咁，郁吓隻手指即可放大縮細圖像，對啲有老花眼嘅議員嚟講唔夠方便。而且螢幕冇保護貼，搞到坐喺後面嘅議員可以望到前面嗰個做緊乜，冇晒私隱喎。
新系統助議員一眼關七
IT豪雖然唔多like個新螢幕嘅功能，但係就好歡喜佢嘅高清設計，仲對新大樓電腦系統讚不絕口。事關現時議員喺立法會開大會時，冇辦法知道其他幾個會議室嘅情況，如果咁啱同時有其他委員會開會，議員就會分身不暇，一個唔留神仲會搞到唔夠法定人數流會，或錯失發問嘅機會。新系統就解決到呢個問題，議員可以同時睇到四個會議室嘅開會情況，仲會顯示埋要求提問議員嘅排隊順序，咁就萬無一失啦！