政情：議員轉矛頭「質」爆三局長
財政司司長曾俊華炮製嘅「史上最廢」預算案令全城震怒，示威不斷，但曾俊華繼續厚顏無恥唔肯引咎辭職，一班立法會議員暫時都冇佢辦法，惟有將焦點分散去唔同政策局。立法會財務委員會將於下星期一開始、召開一連五日嘅預算案特別會議，就各個政策局同部門嘅預算開支質詢相關官員，聽聞班議員已經磨拳擦掌，準備好好招呼一眾高官。
班議員對預算案有幾不滿？睇吓佢哋喺會前提出書面質詢數目就知道。六十位議員裏面，有五十六人提咗書面質詢，質詢數目破晒歷年紀錄，總共有三千九百二十八條，真係難為啲負責草擬答案嘅低級政務官，各政策局及部門好應該將所有質詢轉交晒畀財政司司長辦公室回覆，等鬍鬚曾自食其果。
眾多質詢裏面，矛頭隊得最多嘅頭三位，分別係社會福利署、教育局同食物及衞生局轄下嘅衞生科。社署排得第一位，足以證明班議員同市民最關心嘅係社會福利政策，總提問數量近十分一，達到三百五十條之多，再加上勞工及福利局同勞工處亦分別收到過百條質詢，雙雙打入十大，勞福局局長張建宗隨時又要好似早前處理新交津風波咁、幾晚通宵唔瞓覺先搞得掂。
排第二嘅教育局亦唔好得幾多，局長孫明揚先後被直資學校混帳醜聞同英皇書院縮班爭議搞到佢成頭煙，今次預算案佢又收到二百七十七條質詢，肯定煩上加煩。
外號「每周一鑊」嘅食衞局局長周一嶽今次僅僅名列第三，其實已經算係執到。前一排流感肆虐，加上公立醫院醫生群起抗議，今年衞生科只收到一百九十四條問題，連二百條都過唔到，一啲都唔算誇張。除咗頭三名外，針對民政事務局、環境保護署同康樂及文化事務署嘅問題亦唔少，可見最令議員關心嘅，仍然係一啲同市民最切身同最貼身嘅部門。
陳淑莊「問題王」 方剛無聲抗議
議員提問數目方面，今年公民黨嘅陳淑莊以二百八十三條當選「問題王」，其次嘅社福界張國柱同民協馮檢基都問咗超過二百條。中總黃宜弘同金融服務界詹培忠，再次一條問題都冇問。自由黨副主席方剛據聞就係專登透過零質詢，對曾俊華同預算案無聲抗議。