國務院總理溫家寶日前表示，當前最大危險在於腐敗。
冇錯冇錯，講得一啲都冇錯，功夫茶舉腳贊成！腐敗的而且確危險到極，簡直係禍國殃民。問題係，國家領導人有決心、有辦法、有能力、有勇氣掃除腐敗嗎？
唉，腐敗呢家嘢真係非常之咁危害國家安全o架，大家睇睇港產六合彩報走私北上掀起熾熱賭風荼毒同胞吖，禍害愈來愈大，病態賭徒傾家蕩產不計其數，當中又係涉及一連串腐敗問題。就以重災區深圳為例，寶安區近日被揭發有市場出現「六合彩報走廊」，十多檔小販喺眾目睽睽之下出售種類繁多嘅非法六合彩報，包括港產六合彩報《六合皇》及《創富》。明明係犯法嘅勾當，市場人員又唔管理，政府部門又唔執法，當地居民怒斥當局放縱，導致彩禍肆虐，質疑背後涉及貪污腐敗包庇放縱。
深圳呢一個市場該煨咯，唔單止接近三分之二攤位已被販賣六合彩報嘅不法分子取代，連多間做正經生意嘅商舖都因為「無王管」而兼營彩報。
呢嗱嗱嗱，你話係咪腐敗吖？你話係咪危險吖？前港區全國人大代表朱幼麟仲話，原來唔止深圳有市場公然販賣六合彩報，連廣州亦有類似嘅「彩報廊」。朱幼麟認為中港兩地都有責任，香港要堵塞港產六合彩報走私返內地，內地執法者必須嚴加掃蕩。城市大學專業進修學院學術統籌宋立功就話嘞，販賣六合彩報情況一次比一次嚴重，內地警方要檢討究竟係咪有人幕後包庇。
講到港產六合彩報咯喎，不得不提臭名遠播嘅淫賤黎，呢條友仔好鍾意發不義之財o架，絕對係彩禍其中一個罪魁禍首。三份港產六合彩報《創富》、《六合皇》同埋《貼士皇》，就係曾經由淫賤黎擔任董事嘅公司承印。有人將呢三份六合彩報源源不絕走私運上內地，奇就奇在竟然唔見中港兩地執法者全力取締。
計功夫茶話齋，國家領導人與其嚴防人民力量廣泛種植「茉莉花」，不如認真搞掂害人不淺嘅「六合花」，呢朵花破壞力大過茉莉花呀。淨係知道腐敗問題最危險係冇用嘅，你唔去雷厲風行消滅腐敗，乜都係假嘅啫。
腐敗之所以危險，歸根究柢就係官奸勾結、兵賊不分、群魔亂舞，任由彩禍遍地開花害到老百姓家散人亡。
講到尾，腐敗當然最危險，包庇彩禍險上險。你試下繼續放縱諸如淫賤黎等等一眾黑心分子荼毒同胞吖，雞毛鴨血嘅受害者隨時民憤爆煲，到時咯喎，輪到茉莉花遍地開花！