中環出更：金刀梁坐輪椅搭「鑽的」
自詡係國際城市嘅香港，一直未有為坐輪椅人士提供足夠嘅無障礙交通工具，令到由客貨車改裝嘅非法的士隨之興起。首間無障礙的士「鑽的」公司尋日舉行開幕儀式，獲一眾政商名人撐場。行政會議成員兼安老事務委員會主席梁智鴻坐上輪椅親身體驗坐鑽的嘅感覺，仲大讚感覺好好。
香港社會創投基金有份投資呢間的士公司，所以香港社會創投慈善基金會顧問委員會主席夏佳理（Ron）、基金創辦人兼行政總裁魏華星都有出席。身兼港交所主席嘅阿Ron三句不離老本行，笑稱假以時日，鑽的可以考慮上市喎！身家數以十億計嘅「的士大王」泰和車行第二代接班人伍海山，亦都以投資者身份撐場。
車商倡提供優惠
鑽的係用豐田改裝而成，所以豐田汽車高層岩田秀行專程由日本來港，獲得大家鼓掌打氣，現場溫馨熱鬧。豐田代理商皇冠汽車分銷部助理總經理程展強就話，香港面對人口老化問題，輪椅專用私家車嘅市場潛力好大，但改裝車要交稅，港府應該提供稅務優惠，惠澤坐輪椅嘅社群。據講投入服務初期只有五架鑽的，乘客需要致電預約，未來或可增至二、三十部。
卓妮