中環出更：雷林靜怡遊東京 親歷地震
日本九級地震反轉多個縣市，造成數以萬計死難者，東京損毀算輕微，但核電站事故導致供電不足，東京一度出現交通大亂，人心惶惶。九巴家族後人雷兆光同太太雷林靜怡（Jane）喺地震一刻都身處東京旅行，嚇到慌忙逃生，並取消行程急撲機位返港。
嚇到想喊唔敢瞓
卓妮前日下午路過中環置地廣場名人聚腳地Cafe Landmark，遇見素顏打扮、挽住個黑色巴黎世家手袋嘅Jane，原來佢約咗兩個閨中密友High tea，相當寫意。三人傾足三粒鐘，期間阿Jane表情肉緊，不時講到皺晒眉頭。卓妮八到，談話內容並非八卦新聞，而係活生生嘅地震經歷。
阿Jane透露，九級地震當日，佢正同老公及友人去東京旅遊，抵達酒店後一個鐘，突然感到腳下猛烈搖晃，幸好佢哋當時喺酒店Lobby，見勢色唔對，馬上跑出酒店外空地避災。首次經歷地震，阿Jane嚇到想喊，腦海即時諗起香港三個寶貝仔女，惟有祈求上天保佑大步檻過。
其後餘震不斷，阿Jane同老公商量後取消原定行程提早返港，但航班機位非常緊張，要等到周日先有位，令兩公婆心急如焚。等到餘震減弱，兩人返酒店休息，夜晚都唔敢瞓，成晚
實電視公布最新地震消息。
歷險兩日一夜，阿Jane同老公最後平安抵港，返到屋企後第一時間攬住仔女錫錫。講起再去日本，阿Jane話暫時唔會去住，等市況平靜啲再算喎！
卓妮