政情：KK倡政府減買核電
日本福島縣爆發嘅核危機持續擴大，港人人心惶惶，亦引起立法會各黨派議員群起關注。民協馮檢基（KK）就翻舊帳，話去年施政報告提及要將本港嘅核能發電比例增至五成，佢認為港府應參考日本嘅核危機，三思而後行，考慮抽起有關項目喎。不過，就算買少啲電都無可能停止大亞灣核電廠運作，唔知KK取消增加買電背後嘅用意係乜呢？
除咗KK之外，公民黨黨魁梁家傑及民主黨甘乃威尋日都入紙，申請喺今日嘅立法會會議上提出緊急質詢，分別要求港府官員就日本進口食物嘅安全問題，及本港就福島核事故嘅應對措施作公開交代。旅遊界謝偉俊亦想質問港府，點解至今仍唔向整個日本發出黑色外遊警示；自由黨更希望立會能就核事故作休會辯論。
不過，芸芸申請之中，暫時只得梁家傑嗰個質詢闖關成功，如果全部批晒的話，預計今日會議將再成為長命會。講番預算案表決，作為泛民嘅KK竟然話，泛民同港府敵對關係唔健康，仲話民協願釋出善意，如果港府肯應承佢復建居屋或推全民退休保障其中一項嘅話，佢可以投贊成票喎。