政情：鄉議局擬賣地填氹
新界鄉議局位於沙田石門新大樓喺五月底舉行開幕儀式。新會址花咗一億八千萬元興建，導致該局欠債幾千萬，難怪主席劉皇發尋日都話要出售現時九龍塘局址，暫解燃眉之急。鄉議局尋日舉行閉門會議商討出售局址問題，發叔會後話，希望局址賣到兩億元以上，咁就可以有閒錢買其他嘅物業收租，但一切仲要等測量師估值。
鄉議局舊債未還，但開支接踵而來，除咗下月初新大樓入伙儀式近百萬元使費外，尋日開會又建議斥資三十萬元為鄉紳買制服。結果意見紛紜，有人覺得制服要做得好好睇睇，唔好顯得新界人頭耷耷，有人就嫌貴，最後決定用者自付，總之發叔下令要做得好好睇睇。
另外，講起近期廿七個鄉事委員會改選，發叔話最少有十一個新面孔，當然包括佢無咗嘅屯門鄉委會主席個位啦，佢話多啲後生出來為社會服務係好事。至於鄉議局主席地位有冇被動搖，發叔就笑笑口話無諗過，只係做咗幾十年都攰喎！