政情：曾蔭權聞溫總心虛
特區政府施政頻頻失誤，被譏為「史上最廢」嘅預算案更觸發滔天民怨，國務院總理溫家寶前日喺全國人大閉幕後嘅中外記者會上，對特區政府提出三項要求，仲特別針對港府有充裕的財政收入和雄厚的外匯儲備，認為應該開倉紓解民怨。總理今次提點得咁詳盡，唔怪得煲呔曾尋日被問及此事時，即刻手騰腳震，連手上嘅請願信都跌咗落地。
嚇到跌請願信
曾蔭權尋日朝早去政府總部出席行政會議，照例遇到市民請願，尋日嘅政府總部門外，市民都有幾個唔同嘅訴求。煲呔曾踏入政府總部，接過市民嘅請願信，記者問佢溫總提點嘅問題隨即喺佢耳邊響起，佢唔知係唔係一時心慌，封信就跌咗落地。
煲呔曾嘅隨從身手敏捷，即刻彎低身幫佢執起封信，記者繼續再問煲呔曾，佢都繼續充耳不聞，反而故作鎮定，一面上樓梯，一面擰轉頭向鏡頭強顏歡笑。如果佢餘下任期再唔知錯能改，施政再唔以民為本，呢啲出洋相嘅場面，仲會陸續出現。