政情：王冬勝係下任財爺？

面對阿松「突襲」，王冬勝當堂嚇咗一嚇，即時耍手擰頭話：「唔係，我唔知呀，我唔評論，唔好話我係呀！」不過空穴來風，未必無因，素來有「銀行界梁朝偉」之稱嘅王冬勝，喺財金界舉足輕重，傳聞對政治亦有一定野心。之前幾次財政司司長要換人，王冬勝都被傳係熱門人選之一，更有人話佢一直吼住李國寶個金融界立法會議席，令人覺得阿松今次絕非山草藥亂噏。

傳港府有意斬纜

雖然鬍鬚曾現時面臨四面楚歌仍堅拒下台，不過喺過去兩星期嘅兩會期間，政圈曾經傳出一個說法，話無論下屆特首由邊個跑出，政務司司長一職都必然會換人；律政司司長黃仁龍亦早已放風無心戀戰，盛傳由法律界「紅人」翟紹唐接任；至於今勻大失分嘅鬍鬚曾，即使佢想連任都唔會有人搵佢做，故下屆特區三名司長極可能要一次過換晒畫。

部分政圈中人就認為咁樣「大換血」法，會令下屆政府出現過渡危機，其中一個補救方法，就係早啲換走其中一司，等其接任人早日上場，熟習環境，順利過渡下屆政府。以現時形勢睇嚟，民望插水嘅鬍鬚曾自然成為要提早離場嘅大熱門。

其實港府早已知道，留鬍鬚曾喺度等同免費送彈藥畀泛民狂插港府，變相幫佢哋助選。前高官王永平日前更加爆響口，話鬍鬚曾即使依家唔走，等風頭火勢過後先落台謝罪都得。事已至此，唔知港府會唔會喺七一呢個民怨爆發點前，狠心切走鬍鬚曾呢個負資產？