如果大家有駕駛經驗，應該聽過一般汽車有三條柱，分別係Ａ柱、Ｂ柱同埋Ｃ柱。三條柱到底係乜傢伙呢？Ａ柱位於擋風玻璃同前車門之間，Ｂ柱位於前車門同後車門之間，Ｃ柱位於後座旁邊，三條柱嘅主要作用當然係支撐車身啦。
三條柱之中以Ａ柱最受關注，無他嘅，因為隨時遮擋司機視線吖嘛，一不小心造成盲點，車毀人亡都似。所以咯喎，各大車廠設計新車嘅時候都會絞盡腦汁務求Ａ柱盡量減少遮擋司機視線嘅危機。
大家一定會問，搞乜鬼忽然之間講汽車設計呀？日本地震震懵咗咩！稍安毋躁，等功夫茶講多個古仔，大家就會明白o架喇。
話說港鐵斥資四億元購買二十二部第四代輕鐵列車，並且將百幾部舊車翻新，設計同新車睇齊，之但係新車設計問題多多，最嚴重嘅居然係遮擋司機視線！
原來輕鐵新車嘅擋風玻璃旁邊有兩條又粗又大嘅柱，粗達五至六吋，直情同一隻手掌差不多，好似兩條龍門柱咁樣包住車頭玻璃。唔使多問啦，兩條大柱嘅作用等同於普通私家車嘅Ａ柱，問題係，使唔使咁大碌呀？所在位置又使唔使阻頭阻勢呀？好多車長都反映過呢個嚴重問題，行車期間視線大受影響。
除咗粗碌大柱妨礙眼球運作之外，車頭玻璃又有反光問題，夜晚尤其明顯，車長經常受到強光刺眼而睇唔清路面情況。你知啦，開車最忌就係視線模糊，萬一同其他車輛撞到一仆一碌咁點算呢？
好嘞，車長作為前線用家當然向上頭反映啦，你估港鐵有乜嘢回應吖嗱？哈，佢哋居然係闊佬懶理喎，港鐵繼續以新車作為藍本將舊車翻新，亦即係將設計失誤問題進一步擴大！
呢嗱嗱嗱，之所以功夫茶要同大家講Ａ柱囉，事關先進車廠真係好注重Ａ柱設計o架，一定唔會好似港鐵咁罔顧車長同乘客嘅安全。
話時話，原來輕鐵新車係中國製造，你估會唔會因為係國貨所以設計出現問題吖嗱？功夫茶雖然十分愛國，不過有時對於國貨真係信心麻麻。就好似○九年咁吖，當時曾經發生過「未出車先出軌」事件，一列輕鐵新車喺屯門車廠試車時突然出軌，話就話意外成因係輔助路軌嘅承托力不足所致，但係始終令人對於新車嘅信心大打折扣。
不如咁講啦，麻煩港鐵行政總裁周松崗嚴肅看待輕鐵車長嘅寶貴意見，認真改善新車設計。阻礙視線呢家嘢可大可小o架，搞出人命就唔好啦，冇必要做一個攞你命嘅千古罪人啫！