政情:陳智思要為地震賠償
日本大地震，熱愛東瀛文化嘅香港人密切留意災情，上星期五震災爆發之時，港區全國人大代表陳智思（Bernard）搭緊飛機去北京，佢一抵埗開手機，即刻收到助理短訊，跟住公司職員又密密匯報災情。為乜佢哋咁緊張？因為Bernard旗下間保險公司有份為日本地震保險賠償做分保囉。
外號「公職王」嘅Bernard，公職繁忙，公司業務一樣纏身，分別擔任家族生意亞洲金融集團同亞洲保險總裁。Bernard指，日本大地震，全球保險公司難獨善其身，事關分保地震賠償係家常便飯，不過員工第一時間向佢派定心丸，評估亞洲保險要賠償嘅金額約一千萬港元至幾千萬港元左右，「損失」唔算嚴重。
Bernard話，做得分保，預咗要賠，錢銀「損失」小問題，反而希望日本災情能受控，減少人命傷亡，尤其擔心地震帶延至日本中部，事關佢有唔少朋友定居東京。