立法會一個委員會尋日討論有關建議時，保險界議員陳健波唔知係咪平日慣咗包裝保險產品，對「生命‧源」呢個名頗為保留，覺得令人聯想到「生命玩完」嘅意思，聽落有啲古怪同負面，言下之意就係問政府會唔會改名。
食物及衞生局局長周一嶽就話個名係由年輕藝術家提議嘅，自己唔係藝術人唔敢批評，但當局都幾受落，覺得可解做「生命起源」，寓意捐贈器官可令病人重獲新生咁話，仲話個名含蓄啲，反而可吸引市民留意同思考箇中意義，總好過就咁叫做「器官捐贈公園」。
另一位議員潘佩璆亦加把口，仲集兩家之大成，話個名可以解一個生命完結，另一個生命重生。大家「完」來「源」往下愈講愈玄，最後政府都係決定保留原名。