政情:五散人歸邊愈玩愈散
立法會俗稱「五散人」嘅五名獨立議員，向來都散修修，雖然佢哋曾經話過希望大家可以團結啲，以增加與港府嘅議價能力，不過隨着特首選舉日漸逼近，各人早已各自歸邊，大家愈走愈遠，就連佢哋原本嘅「每周一會」都已成絕響。
據講，「五散人」向來都約定逢周三立法會大會前，到中國會齊齊食早餐，順便開會交流。不過，由於「五散人」之中嘅陳茂波同譚偉豪都係虔誠基督徒，故時時都因上教堂而遲到，最後搞到流會收場。其後，佢哋雖曾試過將會議改喺周五舉行，但各人出席率依舊欠理想。直至近期，佢哋更改以電話溝通，見都懶得見。
有「散人」亦向我哋透露，佢哋圍內根本冇召集人制度，故即使佢收到港府電話，亦唔會幫手轉達畀兄弟知，勢要港府自己call齊班兄弟以示尊重，可見五散人皆想被視為獨立議員，多過係一伙人。不過，有「散人」就直言對大家愈行愈遠不表可惜，認為大家毋須刻意團結，順其自然就好喎。