民主黨計劃本月三十日向財政司司長曾俊華提出不信任動議，希望一腳踢鬍鬚曾落台。點知建制派使出一招大包圍，尋日民建聯抽籤奪得當日兩個辯論嘅機會，不信任動議無法提出。不過民建聯主席譚耀宗就否認夾埋保鬍鬚曾，仲話十六個建制派議員同時想提動議搞到要抽籤，只係因為今屆立法會會期就完，大家驚冇時間討論關注嘅議題，先不約而同一齊提動議喎！到底建制派係咪咁多議題要講，睇吓三十日之後仲有冇咁多人要提動議，就自有分曉。