政情:葉劉圖取港島兩席
人大、政協會議曲終人散，北京「兩會」從來係香港政圈資訊集散大平台，會期結束，京城嘅小道風聲亦徐徐南傳香江。消息指，中央已同建制派各黨正式展開對明年立法會選舉嘅協調部署，最新形勢比想像中複雜，除咗重災區新界東之外，港島亦係大混戰嘅戰場，現時喺港島各佔一席嘅民建聯同新民黨主席葉劉淑儀，都想霸多張櫈仔，連負責協調嘅中央部門都勁呻頭痕，形勢有幾惡劣，可想而知。
每次區議會同立法會選舉，建制派各黨事前都要協調，次次講數角力拗手瓜，換着普通人，都會感到厭惡，但對政治動物嚟講，則甘之如飴。據悉，負責為建制派從中斡旋協調嘅部門，已趁「兩會」期間，就兩個選舉向身在北京嘅各黨核心摸底兼交流最新訊息，綜合多個渠道消息，明年立法會選舉建制派要成功協調，比過往任何一次都困難。
明年立法會直選新增五席，比例代表制下當選所須嘅得票率門檻進一步降低，尤其係新界東，新增兩席至一共九席，隨時只要攞到百分之七、八成選票就可當選，呢個誘因就好似一服強勁政治迷幻藥，令建制派集體亢奮，人人如癡如醉，信心滿滿能夠當選，一齊湧落新東霸位。經營多年嘅民建聯同自由黨自不待言，工聯會葉偉明亦加入戰陣、龐愛蘭捲土重來、方國珊要圓直選夢、依家連以前為民建聯抬轎嘅公民力量，都要戙支旗出嚟選，如果加埋最近喺新東插旗嘅新民黨，新東建制派陣營真正係七國爭雄，混戰一場。
帶史泰祖入局
有消息話，○八年循港島殺入立法會嘅葉劉，月前曾有意空降新東，但有人提醒佢，贏到新東，未必保得住港島，叫佢諗清楚。而「兩會」後嘅最新形勢，葉劉傾向留守港島，但就部署喺港島攞兩席，帶埋副主席史泰祖入局。
港島預料會新增一席至七席，建制派取三席不難，奪四席機會渺茫，現時民建聯一席，葉劉一席，即係仲有一席嘅拓擴空間，前者明年勢拆隊參選，希望力推副主席張國鈞入局，加上自由黨從未放棄港島，建制派或釀成鷸蚌相爭，泛民漁人得利嘅局面。○八年葉劉同民記分票唔勻，令建制派失去一席，協調部門至今餘悸猶在，梗係唔想事件重演啦，最終能否四四六六拆掂佢，大家拭目以待。