中環出更：徐立之禁足港大女生宿舍
大學校長，萬人景仰。但唔代表可以打橫行。港大校長徐立之喺校園打晒骰，但講到有六十年歷史嘅港大女生宿舍，佢都自爆從未踏入半步，皆因女生宿舍規矩嚴，除非有宿生邀請，否則校長都要食閉門羹。
港大唯一女生宿舍──何東夫人紀念堂，尋日邁進六十周年，大學請嚟一班知名舊宿生齊齊慶祝。徐校長都為「何東姊妹」一段光輝歷史感到自豪，不過「舍有舍規」，佢至今只行過「何東」門口，未入去參觀過。
楊紫芝張婉婷想當年
港大榮休教授楊紫芝就好彩好多，佢係「何東」第一批宿生，堪稱「何東大姐大」。
回首當年，楊教授最愛約班同學喺宿舍挑燈夜讀，試過三更半夜討論問題時聲浪太大，被其他宿生敲門投訴。住宿三年，最難忘係當年舍監照顧周到，早餐必有牛奶、鮮橙及三文治，周六仲有豬膶補充營養，食到個個肥肥白白。
獲獎無數嘅《歲月神偷》監製張婉婷原來都係「何東人」，尋日舊地重遊，心情興奮。張導演當正「何東」係娘家，當年拍攝電影《玻璃之城》，專登揀嗰度實地取景，引為城中佳話。書卷氣濃嘅張導，大學時原來坐唔定，多次號召成班女宿生參加體育比賽。佢笑言，當年喺運動場嘅時間，仲多過喺課室，所以畢業時，好多同班同學都唔多認得喎。
卓妮