中環出更：紅姑掃貨睇中Sales高踭鞋
春回大地，係時候送舊迎新，將衣櫃內黑沉沉冬裝，換上朝氣勃勃春夏新裝。近年回春有術嘅性感女星鍾楚紅，着衫向來唔太花巧，可惜身形較小巧，紅姑買鞋時，一於「高人一等」。尋日出動狂掃法國鞋王Roger Vivier，興之所至，紅姑一度叫店員脫下腳上高踭鞋，畀佢試一試。
戴黑超仍難掩星味
過着獨身生活嘅紅姑，一啲都唔寂寞。春裝排滿名店櫥窗，紅姑都按捺不住，尋日high tea時段現身中環置地名店Roger Vivier。戴上黑超嘅佢，難掩星味，一入店內，已被店員認出，熱情地招呼佢入VIP房慢慢揀。
坐定定後，紅姑由新貨開始掃射，上至眼鏡，手袋，下至高踭鞋，統統唔錯過。卓妮發現，孭住Roger Vivier手袋嘅佢，眼甘甘望住一個同系列嘅Clutch Bag，恨不得將個包包帶埋返屋企。
試鞋時，紅姑更顯奔放，高貴密頭鞋、露趾高踭鞋，一律要試，紅姑瞄到女店員着住一對新款三吋高深啡色高踭鞋，登時雙眼發亮。
未知是否因為鞋款碼數已賣斷，職員二話不說割愛，除鞋畀紅姑試真啲，寧願自己光住腳。咁體貼，無理由唔幫襯。紅姑一口氣買夠五對，再加一副黑超同一個Clutch Bag，滿載而歸。使咗幾多錢？紅姑笑而不答，睇嚟金錢數目喺佢眼中，並唔重要。着得靚，乜都抵番晒！
法國設計師Roger Vivier，被喻為二十世紀最偉大鞋履設計師之一。佢擅長展示女性美腿曲線。設計高雅、尖頭幼踭，係Roger Vivier最大特色，深得歐洲皇室及荷里活明星寵愛。瑞典維多利亞公主早前出嫁，都着Roger Vivier配襯婚紗。
卓妮