街招攻陷鬧市損港形象

■記者 梁少儀 攝影 蕭智湲

內地旅客陳先生因香港有「購物天堂」美譽慕名而至，來港後盡情購物之餘，亦發現街上有大量街招，旺角及灣仔等購物區的情況尤為嚴重，儼如鬧市一大特色，令陳嘖嘖稱奇，「好多燈柱、欄杆、交通燈，連垃圾桶都貼晒街招，點解國際都會會係咁㗎！」

有青年亂貼街招，被警員阻止並勸喻離去。

張貼街招者肆無忌憚，利用每一當眼位置貼上街招。

無獨有偶，在荃灣上班的許小姐亦發現區內常有大量街招，不滿當局未有嚴厲執法致亂象叢生，「每次行落街都見到有新嘅街招，就算有清潔工搣走咗，好快又有人貼番，邊間公司貼咪告邊間囉，有乜理由咁縱容法？」許直指食環署處理不善，令問題愈來愈嚴重。

街招清理未幾，隨即再度被貼上。

放大圖片

無視警員在旁照張貼

記者曾前往旺角、荃灣及灣仔視察，同樣發現大量借貸、收車等街招，不少街招均「新簇簇」，同時亦目睹有貼街招者公然張貼，即使有警員在旁亦毫無顧忌。

就有關違規街招的問題，食環署一直束手無策，去年首十個月期間，單在旺角區已清除街招逾八十萬張，平均每日清理的街招便有二千七百多張，惟被捕的違規者卻僅得二十三人，至於荃灣及灣仔區的情況亦同樣嚴重。面對情況幾近失控，食環署發言人仍只重申，潔淨服務承辦商每日會清理非法展示的街招，亦會向違例張貼者發出一千五百元定額罰款通知書。職員倘在現場發現張貼街招、海報人士，並蒐集足夠證據後，將考慮檢控違例者、招貼或海報受益人。

議員促檢控違規公司

「唔好淨係拉貼街招嘅人，登喺街招上面嘅公司都應該被檢控，咁先唔會有人再咁肆無忌憚！」立法會議員食物安全及環境衞生事務委員王國興狠批食環署對付街招問題「治標唔治本」。王憶述擔任前市政局公眾衞生委員會副主席時，亦曾處理難以檢控違例街招的問題，最後大會通過會檢控張貼街招的公司，結果即時令街招數字大減，「依家食環署都冇人督促，諗住搵人摵咗啲街招就算，冇諗過點樣根治問題，打擊違規嘅人先至係最重要！」王建議食環署參照前市政局做法，檢控刊登於街招上的公司，以杜絕違規問題。