探射燈：福利傾斜「中產係中慘就真」
中產階層一直「付出多、福利少」，即使年年高呼不公平，但政府依然懶理，拒絕施以援手。在高通脹、高樓價持續不跌下，中產人士未能享受到與付出成正比的生活質素，甚至要節衣縮食、慳得就慳，以應付未來及退休生活開支，壓力幾近爆煲，有中產代表狠批政府福利政策嚴重傾斜，更自嘲是中慘。
上車難 醫療福利享受唔到
「交通費係咁加、教育制度混亂、醫療福利享受唔到，統統都要靠自己。」中產之聲主席李子榮直言，中產階層向被忽視及冷血對待，「我哋嘈得少，號召力又唔夠低層，政府咪唔理囉！」李續說，有樓的中產情況尚可，無樓的中產在樓價持續飆升，「上車」非常困難，被迫與父母同住，或節衣縮食儲首期，「唔好叫我哋中產，我哋係中慘就真！」
中產動力主席馮煒光亦說，相比起基層，中產生活不算困苦，但同樣受到通脹高企，及樓價飛升影響，工資增幅永遠跑輸通脹，冇樓一族眼見財富不斷被蒸發，亦無可奈何，「政府唔肯增加土地供應、唔肯復建居屋，置安心又要等到下年先有，等地產商有時間出貨，完全無諗過中產嘅困苦。」