亞視明日首播帶政治性通識節目《我要做特首》，但節目未出街，已鬧出政治審查風波，想喺紅隧口掛廣告牌，但遭拒絕。
《我要做特首》被審查，相信同廣告牌嘲諷港府嘅三位司長有關，世事真係無奇不有，亞視紅色資金背景愈嚟愈濃烈，點解可以製作呢類政治節目？喺今日港府管治岌岌可危下，咁樣做係咪想添煩添亂呢？
事件嘅另一個「奇景」，係紅隧由港府全資擁有，而港府同亞視唔係一向關係「唔錯」嘅咩？亞視為新節目賣廣告，紅隧落閘拒絕，咁咪變相打壓亞視收視？情況好似兩兄弟打交咁，真係好好睇。
《我要做特首》由文化人胡恩威主持，廣告牌被紅隧廣告代理博納中國戶外廣告有限公司以「唔適合」為由拒絕。
胡恩威形容係被政治審查，但廣告公司發言人則強烈否認，話公司係從好多唔同角度考慮，認為該廣告唔適宜擺放先至唔接受喎。咁究竟有錢唔賺嘅真正原因係乜呢？