是非人特別多是非，彭定康爭做英國廣播公司信託（BBC）主席，真正係一波三折，首先被外界質疑靠關係搶筍工，跟住被指佢親歐背景，可能遭受BBC高層排擠，到咗尋日，又有消息傳出，英國工黨要求彭定康退出保守黨，以及辭去部分喺商界嘅職務同公職，先至可以上任。冇保守黨就冇肥彭，要佢退黨，即係攞佢命喇。
英國政府提名肥彭做BBC主席，下議院文化、傳媒及體育委員會今日會進行確認程序，就喺呢個敏感時刻，肥彭埋門一腳都要面對政治對手嘅狠招攔截。據英國報章指，工黨對保守黨出身嘅肥彭提出相當辛辣嘅要求，畀佢上任新職都得，但係要佢退出保守黨，以及放棄部分商界職務同公職。工黨呢個要求唔係無道理，以往保守黨執政期間，BBC成日揭露政府隱秘，被保守黨視為仇敵，如果肥彭唔退出保守黨，又點樣服眾？彭定康做咗半世保守黨黨員，唔知佢會唔會為咗份新工，就同養大佢嘅娘家劃清界線呢？