政情：榮智健捐錢撐腎科教父
香港乳癌基金會近日搞咗個名為《暗香疏影》嘅籌款攝影展，展出「腎科教父」余宇康嘅作品。余宇康唔單止喺醫學界享負盛名，原來喺攝影界都好有名望，曾經連任七屆香港攝影學會副會長，前日攝影展開幕引來多位名人撐場，除咗中大校長沈祖堯及行政會議成員梁智鴻外，仲有近期又再活躍金融市場嘅前中信泰富主席榮智健。
現身慈善攝影展
榮智健早幾日先至宣布成為新股「海隆」嘅基礎投資者，認購足足七千八百萬元，前日又以捐款人身份出席余宇康攝影展。作為富豪嘅榮智健做得捐款人，出手肯定唔嘢小，但大會就話因為捐款人想低調，所以唔方便透露捐款額喎，唯一可以確認係佢可以獲贈余宇康嘅攝影作品。
原來凡捐款二萬元或以上嘅善長，都可以獲贈余宇康嘅攝影作品一幅，雖然唔清楚榮智健實際捐咗幾多錢，但大會就話佢今次真係好畀面，捐錢之餘，仲送埋花籃到賀添！