政情：梁安琪榮膺保良副主席
賭王何鴻燊爭產風波拉鋸逾兩個月，四太梁安琪一直寸步不離，細心侍候賭王，但幾忙都好，善事照做。
龐盧淑燕坐正
尋日保良局舉行會員周年大會，選出新一屆董事局成員，四太由總理「升呢」做第四副主席，恭喜恭喜。四太多年來積極參與保良活動，而且局內人緣極佳，所以今次當選，可謂實至名歸。
至於第一副主席龐盧淑燕就坐正主席寶座，龐太當正保良係佢第二個家，今屆索性拉埋靚新抱龐董晶怡加入保良大家庭，擔任總理。龐太係城中新潮奶奶，行街、high tea都預埋新抱，今次婆媳雙劍合璧，必定為保良帶來一番新景象。
講番何家，除咗四太公職身份有變外，賭王千金何超蕸都唔輸蝕，早前當選東華三院副主席，加埋三太陳婉珍做緊東華現任副主席，數慈善大家族，何家當之無愧也！