中環出更：青聯招工送鄭志剛飯局
香港青年聯會搞得有聲有色嘅招工日將於本月十九日開鑼，今年踏入第三屆，青聯一於搞搞新意思，鼓勵有意見工嘅大專生透過網上登記，除咗有機會抽中潮物iPad平板電腦外，有十位幸運兒更可參加「與CEO同枱共進午餐」，有助擴闊視野及膽量。呢位CEO係邊個？咪係身兼香港及全國青聯副主席嘅新世界集團接班人鄭志剛囉！
陳仲尼過五關斬六將
青聯為大專生提供筍工外，香港青聯主席陳仲尼仲分享見工經驗，當年佢讀完大學應徵過花旗銀行，經歷五輪面試先至成功。後來佢又重返校園修讀碩士，修畢後再應徵三間國際投資銀行，令佢印象最深刻係要經過五至六輪面試，其中一次更要飛去美國紐約總部，同老闆單獨喺一間大房內共進午餐，真係見少啲世面都唔掂。
青聯司庫兼招工日召集人彭芷君話，今年提供嘅職位空缺達一千七百幾個，比去年多咗一半有多，共有八十幾間上市公司提供職位，平均工資更由去年嘅九千五百元，增至一萬二千三百元，反映今年市道相當好。佢提醒有意見工嘅大專生，當日記得着西裝去見工，事關佢哋會即場面試喎！
卓妮