全面改革醫管局 為公為私拆佢屋

因乜事幹功夫茶咁興奮？無他嘅，為公為私都真係要全面改革滿目瘡痍嘅醫管局吖嘛，比如一幢又殘又舊嘅危樓，你梗係要清拆重建o架啦，唔通睇住佢冧樓砸死人咩！

為公嘅理由好簡單嘅啫，香港醫療事故多到得人驚，最大禍源係醫管局亂七八糟，資源錯配到不知所謂，當然要以病人嘅福祉為依歸啦，全面改革係絕對正確嘅。至於為私咯喎，功夫茶唔係長生不老嘅神仙，頭暈身無可避免，梗係唔想淪為公立醫院嘅犧牲品啦。

今次為民請命嘅係立法會醫學界議員梁家騮，根據佢嘅講法，醫管局成立二十年嘞，新年度預算創新高達三百六十億元，不過運作透明度極低，公眾對巨額開支一無所知。荒謬嘅係醫管局效率奇低，醫生數目冇錯係有增加，之但係公立醫院仍然面對人手短缺嘅問題。九九年至○九年嘅十年裏面，公立醫院醫生增加三成三，住院人數以及專科門診求診人次分別只係上升一成同一成七，到頭來醫生照樣做到裙拉褲甩踢晒腳，超時工作超到斷六親，好明顯係管理出現極大紕漏。

講到呢度，有必要提提大家，前線醫護人員最近怒火朝天，皆因工作量多到叫苦連天，逃亡潮一浪接一浪。公共醫療醫生協會忍無可忍，向醫管局提出六大訴求，包括加快晉升速度、增設額外當值津貼、公開人手安排等等，若果情況冇改善，不排除工業行動。

梁家騮身為醫學界議員，當然為公為私都要仗義執言啦，所以打算喺立法會提出動議辯論，促請政府全面改革醫管局，包括為醫生制訂標準工時，誓要將醫管局撥亂反正。梁議員仲引述不少前醫管局主席都認為該局弊病太多，其中一名前主席、現任行政會議成員梁智鴻曾經問過佢係咪想改革醫管局，反映問題已經刻不容緩。

唉，講到醫管局資源錯配真係激鬼死人，一方面話前線人手不足，另一方面竟然肥上瘦下，仲涉嫌私相授受添。好似港島西聯網前總監賴福明咁吖，原本喺○六年退休，不過兩次續任至前年，去年更加被委任為高級顧問（醫療事務），而且冇公開招聘。至於○七年時任策略發展總監嘅黃譚智媛，退休之後隨即被委任為綜合中西醫服務顧問，呢個係「無中生有」嘅新開職位嚟㗎，同樣冇公開招聘，難免令人懷疑係度身訂造明益自己友。

點都好啦，既然終於有人出手要求醫管局撥亂反正，不如玩鋪大嘅，索性徹底清拆然後重建，一勞永逸吖嘛！