周日逾萬市民上街，全城怒罵預算案。政府誠信破產，豪派四百億元落得如過街老鼠，都怪鬍鬚曾表錯七日情，由「投資未來」、「嚴防通脹」，到「六千現兜兜即時擁有」，史上最廢預算案出自史上最反智財爺。「政治一個星期都嫌長」，有佢一日「理財」，港人一日都難過，以後千祈唔好再發謬論，大言炎炎「審慎理財」。
派錢未能消市民怨氣，證明好多市民都係有理性，唔似「補鑊方案」三扒兩撥就出台獻世，結果又係紕漏百出，全城聲討庸官。
大家要知道，當市民對政府失信心，派錢都未必止到痛。好似巴林國王上月中宣布全國每戶派放大約二萬三千港元，但反對派還是呼籲群眾上街示威。香港的民怨如果不是去到「臨界點」，又怎會有錢派仲去「打你個鬍鬚頭，打到你唔好再神遊；打你個鬍鬚耳，打到你聽清楚民意；打你個鬍鬚肚，打到你着草去走佬」吖。
再講，連公務員工會都公開反對佢，連重量級學者都公開數臭佢，可見鬍鬚曾真係做一日財爺都難捱。佢又喺《給香港的信》亂開期票，話會透過「凝聚共識，處理復建居屋、收窄貧富」。唉！煲呔曾不是講過「置安心」係「優化版居屋」嗎？你這一廢噏，即使係吹水，可也摑了「真兄弟」一個大巴掌，虧他是全城唯一給你掌聲的人，話你份史上最廢預算案係經過「深思熟慮」。
示威之都，港人再沒有獅子山下拚搏精神，想有歲月靜好的日子，難哉！