政情：公民黨冚實被捕黨員
周日嘅反預算案遊行最終釀成警民衝突，警方最後更以暴力清場及拘捕逾百名示威者，隨即被各界強烈譴責。不過，向來開口埋口講「社會公義」嘅公民黨，面對四名黨員被捕，竟然一改作風，並無同其他民間團體及政黨聯署譴責警方，更傳聞四名被捕黨員要遭黨「照肺」。莫非公民黨有心冚實黨員被捕消息，要同「激」字劃清界線？
該黨九龍東支部主席余冠威，尋日承認自己確喺現場，但聲言只為照顧部分首次參與遊行嘅朋友，點知「意外地跟佢哋衝落去」，結果被捕。余冠威又煞有介事咁話，當日佢係以網台身份參與，與黨無關；而至截稿前我哋都未聯絡得上黨魁梁家傑證實傳言。
向來堅守專業理性嘅公民黨，去年突破與「政壇丐幫」社民連合推變相「五區公投」，最終卻因投票率低而損手離場。今次佢哋刻意冚實黨員被捕消息，難免令人有感佢哋想同社民連割席，勢要重建番「大狀黨」高高在上嘅專業形象。