政情：田少寸細佬關愛遲起步
兄弟分家情義在，世事有冇咁完美呢？自由黨榮譽主席田北俊雖然成日話，同退黨嘅細佬田北辰會繼續傾非政治議題，但係咪真係做到心無芥蒂，睇田少尋日嘅反應就可略知一二。
佢尋日上電台節目，被質疑冇田二少咁關懷社會時，就二少退出自由黨事一直保持緘默嘅田少即刻起弶：「你話佢關懷社會，田北辰都啱啱係六十歲先嚟做呢樣嘢啫！」唔使講咁多，一句就夠晒。
田少初初提到細佬都仲係好聲好氣，點知一再被主持質疑兩兄弟性格不一，一個要話事，一個就關懷社會時，田少嘅反彈就好大，寸爆二少只係最近先開始關懷社會，又話兩兄弟嘅性格分別，就係佢好心急，二少好漏氣，句句頂到盡，睇嚟田少真係氣難下喎！
分享年少經歷
田少尋日分享自己年少經歷，話同細佬當時都唔多關注時事，生活重心圍繞九龍半島，就連香港全貌都唔熟悉，遑論社會政治。
不過時移勢易，做政治唔可以純粹用商界嘅邏輯做事，所以細佬會瞓身執垃圾體驗基層生活，自由黨都唔再保皇，有嗰句講嗰句。