政情：連任鄉局副主席張學明有對手
早前受漏報物業醜聞纏身嘅「新界王」劉皇發，經歷年初村代表及屯門鄉事委員會選舉「外憂」後，嚟緊又將面對六月鄉議局改選嘅「內患」。雖然發叔嘅鄉議局主席地位未被動搖，但佢麾下嘅副主席張學明正面臨暗湧，聞說沙田鄉事委員會主席莫錦貴正積極考慮競逐副主席一職，仲成功拉攏到部分兄弟支持。一波未平一波又起，唔知發叔會點擺平呢場爭奪戰呢？
鄉議局正副主席三巨頭，向來都由來自新界三約嘅人競逐，包括發叔所屬元朗區，張學明所屬嘅大埔區，同埋另一名鄉議局副主席林偉強所屬嘅南約區，而佢哋三分天下多年，一直相安無事。隨着林偉強被「倒強派」煎皮拆骨，動搖其副主席個位後，近日亦傳有鄉紳唔滿意張學明嘅鄉郊工作表現，導火線係同近年村屋僭建理順政策有關。
村屋僭建談判 成導火線
鄉議局多年前已經就村屋嘅僭建問題同發展局磋商，讓經過專業評定無問題嘅僭建物可以繼續存在，但據聞雙方各自堅守底線，導致未能達成共識，令談判膠着。不過，談判一日未完，地政總署繼續將村屋違例僭建個案轉介到屋宇署執法，據講沙田區檢控個案有過百宗，沙田鄉委會因而對談判進度緩慢感到不耐煩，主席莫錦貴更一度去信鄉議局要求正視事件。
就係咁，有鄉紳就建議莫錦貴積極考慮挑戰張學明，我哋仲打聽到，部分沙田同元朗嘅鄉紳都話支持莫錦貴出選，所以場仗未必無得打。之不過，張學明擔任副主席多年，搏命為鄉議局辦事，成績有目共睹，加上有發叔做主席一日，副主席人選出現任何變化，怕且都要聽吓佢老人家嘅意見，但佢屬意邊個上位，大家就要拭目以待喇。
尚未完結嘅部分鄉委會改選又有好戲，前日十八鄉鄉委會改選，原主席程振明敗於挑戰者梁福元之手，連帶元朗區議會當然議員寶座亦拱手相讓，但由於梁福元本身已經係民選區議員，過檔做當然區議員後，佢本身嘅議席就要花公帑進行補選。