中環出更：潤餅春茗感受閩南文化
台灣駐港機構光華新聞文化中心主任羅智成上任之後，積極炮製別出心裁嘅活動推介台灣文化，場場叫好又叫座。早幾日佢又搞搞新意思，喺光華大本營舉行「驚蟄春日潤餅會」春茗，將台灣知名餐廳「欣葉」料理嘅主廚請來香港，現場烹製經典閩南食品潤餅招呼賓客，連著名音樂人羅大佑都聞香而來，賓客擠得水洩不通。
羅智成同卓妮講，佢自細就好鍾意食潤餅，自己會喺屋企包嚟食。欣葉主廚話，潤餅嘅製作秘訣係潤餅皮，佢哋會選用高筋麵粉，令餅皮又薄又彈牙，由於製作潤餅皮好考功夫，所以佢哋特別由台北空運來港。捲入餅皮嘅餡料好豐富，有竹筍、五花肉、紅蘿蔔、椰菜等，夠晒營養又健康。
當日春茗仲有台灣知名嘅南管天后王心心彈唱李清照嘅《鳳凰台上憶吹蕭》等曲目，佢嘹亮陰柔嘅聲音，扣人心弦。此外，已故知名作家林語堂大師嘅書房亦都被搬來香港展覽。林語堂同潤餅有咩關係？因為佢係閩南人，食潤餅係傳統嘛！賓客一邊歎清香嘅潤餅，一邊進入大師嘅世界，飲食同藝術，原來可以咁接近嘅。