政情：孫公慳幾毫翻山返學
全港中學減班減過龍，新學年唔少莘莘學子焗住要跨區返學，教育局局長孫明揚唔覺有問題，仲話搭港鐵就搞掂，被對減班不知幾肉緊嘅前天文台台長林超英譏笑冇地理知識。尋日喺中環遇到孫太鍾小芬，佢自爆老公細個時為咗慳幾毫子，試過由灣仔翻山去香港仔返學添啦！
孫太撐跨區冇問題
孫太為老公抱不平，話跨區返學唔係乜嘢大問題。事關佢同老公都係過來人。孫太話，自己細個時由灣仔住所跨區去中西區嘅英皇返學，老公就住喺灣仔鳳凰台，有時為咗慳幾毫子，仲會翻山越嶺去香港仔返學添！講起跨區返學，孫太唔止覺得冇問題，仲話好多家長為咗搵心水學校，都唔介意跨區喎！嘩，翻山越嶺返學，唔止識地理，仲識埋地質學添喎。
其實講到返學，孫公自有其一番經歷，之前佢講過喺佢小時候，人人返學都係就近入學，就係因為咁，佢細個曾經入讀女校寶血，做女校男生，估唔到佢除咗試過就近入學，亦都試過長途跋涉返學，都幾極端喎。