政情：蘇菲梁分享家鄉「潮」食

至愛滷水鵝飯

平時十分好客嘅經濟動力尋日請一班要OT嘅人員食飯，不過就唔係呢期最紅嘅粟米斑塊飯，而係滷水鵝飯。唔通佢哋想向一眾議員暗示：幾日都哦哦，等到頸都長都未開完會，搞到身兼港區人大或政協委員嘅佢哋趕唔切去北京出席「兩會」？

議員梁劉柔芬（Sophie）笑笑口話，請大家食滷水鵝飯完全冇呢個意思，只係身為潮州人嘅佢，有個識咗十幾年嘅鄉里開潮州菜館，當中嘅滷水鵝好出名，佢自己都非常鍾意，所以先攞嚟同大家分享吓啫！

身為尊貴嘅立法會議員，Sophie會唔會好似財政司司長曾俊華咁食米唔知價，連滷水鵝幾錢一隻都唔知？Sophie冇直接回應知唔知價，但就話同鄉成日都冇收佢錢，所以要諗吓點樣回報佢喎。