政情：超廢預算案質詢爆燈
今年財政預算案發表短短一星期已被封為「三最」，可謂前無古人，既是「史上最廢」、仲係最快跪低，搞到天怒人怨後，尋日仲打破埋立法會紀錄，成為收到最多提問嘅預算案。提問喺尋日凌晨十二點截止，根據立法會秘書處嘅數字，今年一共收到超過四千條質詢，比去年多出近一千二百條，唔計立法會主席，每個議員平均問七十三條，足以反映議員對預算案怒氣難消。
每年預算案出台後，議員都可以就政府各個部門嘅開支提出書面質詢，以監察港府嘅資源運用，但過往一般只有二千幾條問題，去年多個黨派不滿預算案無長遠扶貧措施，質詢超過三千幾條，問到爆晒燈，點知高處未算高，今年嘅提問高達四千三百五十一題，比上年多咗三成六。
多涉社福教育政策
當中最多議員關注社福政策開支，皆因貧富懸殊問題隻字不提，其次係教育問題。
被封為「問題王」嘅陳淑莊，今年就問咗近三百條質詢，由運動政策、環保、房屋等等乜都有，另一個「問題王」工聯會王國興，就話會繼續向每個政府部門索取非公務員嘅薪酬數據，包括有幾多人攞到最低工資，同埋有幾多人合資格攞鼓勵就業交通津貼等。如果佢發現政府剝削嚴重，肯定嘈到拆天，將會成為港府另一個政治炸彈。
方剛「無話兒」抗議
不過，唔係個個議員都鍾意用提問嚟表達不滿，好似自由黨副主席、立法會批發及零售界代表方剛，就以拒絕提問嚟抗議預算案。方剛話今年預算案有好多嘢都好古怪，例如加煙稅同汽車首次登記稅咁，又唔見得有效用，但又令業界增加無限麻煩。方剛原本都想提問嚟為業界發聲，但見政府成日淨係識得開錄音機，答嚟答去都係得行貨，所以寧願留番遲啲喺特別財委會一次過問就算。
今年預算案質詢破紀錄外，仲有泛民議員呻話，本身預備咗啲強積金注資嘅提問，點知政府無喇喇急轉彎跪低，嘥晒佢哋啲心機同人力物力喎！班議員咁多不滿，睇嚟財爺鬍鬚曾仲有大把手尾跟。