鬍鬚曾將反周期變調為反常大手筆派錢退稅之後，香江社會議論紛紛，有些說法，在煲呔曾和鬍鬚曾兩兄弟看來，乃是奇談怪論，甚至是太天真太傻，下面的一段維港解密，據說是曾氏兄弟的密室秘談記錄，我們姑且聽之。
小曾：大哥，你叫我搞掂呢件事先，依家搞掂咗，竟然有人話我哋發爛渣，發晦氣亂咁派錢，將七百幾億盈餘幾乎一鋪清袋派盡。又有人話，揼你心口叫你派錢啫，又唔係撞你心口，使乜派到咁盡呀。呢啲講法奇奇怪怪，大哥你點睇？
大曾：細佬，大哥要上京見國家領導人，呢件事唔搞掂佢，我點見領導人吖。家陣你搞掂晒，通街小市民開口笑，喜氣洋洋，都唔知幾咁愉快，呢啲咪叫做民心民意囉。咁嘅反應，我點會發晦氣發爛渣呀！班爛鬼政客唔識政治，淨係識鬧人。呢次叫做一鋪翻本，唔係一鋪清袋。庫房大把錢，再派Ｎ次都未清袋啦，佢哋太天真太傻啦，我先至係政治家。
小曾：大哥真係政治家？
大曾：梗係啦！我舊年施政報告叫做「民心我心，同舟共濟，繁榮共享」，如果唔叫你搞吓苦肉計，畀人鬧做守財奴，家陣派六百幾億點會派得咁順攤呀。睇到啦，皆大歡喜，呢啲咪叫民心我心，繁榮共享囉。做政治家，就要只求目的，不擇手段，班爛鬼政客同啲壞鬼書生只懂紙上談兵，邊識《君王論》喎。
小曾：有人話我威信掃地，應該引咎辭職，下台問責，連劉兆佳都話官民關係到達臨界點。今次又用苦肉計？
大曾：唔使啦，派錢退稅受歡迎，乜嘢紫荊花革命謝晒，邊個夠我威？明年繼續派，今年六百億，明年八百億，咁就一定冇人上街，乜革命都冇。至於劉兆佳，到咗臨界點先講，佢先至要引咎辭職！
小曾：年年派錢退稅，咁下屆政府點算？
大曾：你傻㗎，關人個關啦。人不為己，天乜地乜，咪咁天真。
史進