中環耳目：KK國金軒宴客最愛生炒骨
廣東社團總會主席王國強（KK）公職多籮籮，每日應酬閒閒哋跑幾場，但佢每逢請客都會首選尖沙咀The Mira嘅「國金軒」粵菜廳。摘下米芝蓮二星嘅「國金軒」名氣響噹噹，ＫＫ最愛佢哋嘅「子薑生炒排骨」，大讚啲生炒排骨皮脆肉嫩，酸甜醬汁恰到好處，笑言係全港數一數二正斗之選。
自創蝦米公仔麵
原來KK愛吃「生炒骨」背後有段古，佢憶述，十幾年前有次去美國東岸探望留學外地嘅囝囝，囝囝就帶佢去當地一間唐人餐館品嘗生炒骨，但估唔到喺外國食唐餐一樣咁惹味，自此佢就愛上生炒骨。另外，KK亦愛國金軒嘅「淮陽浸東星」，佢話東星斑魚肉鮮甜嫩滑唔油膩，啱晒佢注重健康嘅習慣喎。
不過，出街食飯無可避免會油膩，所以KK每逢喺屋企通常會親自下廚煮碗清清哋嘅蝦米公仔麵，先以蝦米及乾瑤柱爆香，再加入煮好嘅公仔麵，連佢細女食過都話又正又好味。晚上夜闌人靜，KK兩父女齊以加料公仔麵做消夜，特別滋味。