中環出更：政商名人點使六千蚊？
財爺鬍鬚曾跪低向市民大派六千蚊，筆錢可以飲啖紅酒就無咗，亦可以換到二百個三十蚊盒嘅粟米斑塊飯，點樣使真係豐儉由人。卓妮先後問過多位政商界名人，佢哋對筆錢點使都有唔同想法，好似中大校長沈祖堯就打算用嚟請學生食飯，一家四口都合資格領取六千蚊嘅全國政協委員容永祺，亦有意食咗筆錢，而菁英會主席白富鴻就主張筆錢用嚟消費。
卓妮尋日喺香港會所門外遇到行政會議成員夏佳理（Ron），佢就話未諗到點使筆錢，加上佢一向都有捐開錢，所以唔會特登搵地方去捐筆錢喎。
夏佳理唔會捐出嚟
不過，阿Ron承認，筆錢會令受惠唔到嘅新移民覺得被人歧視，但話分兩頭，佢認為每樣嘢都要定出界線，唔可以學澳門政府咁派到人人有份，佢話：「澳門有賭場，但香港無，係咪可以喺香港起番個吖。」
同阿Ron一樣覺得筆錢無急切需要嘅瑞士英納格名錶代理高鼎國，話希望捐咗筆錢之餘，仲希望政府今後將資源幫助低下層市民及搞好香港教育，特別係縮班問題。佢話近排忙於為四歲大仔撲小學，轉頭又要幫一歲細仔搵幼稚園，就連報讀playgroup都要凌晨三點去排隊，令佢深明「求」學之苦。至於南太電子集團創辦人顧明均就認為政府可以幫助中小企業同弱勢社群會更好。
白富鴻乘勢賣燕窩
卓妮發現一班名人除咗諗吓點使六千蚊外，有人更諗埋生意財路。經營燕窩生意嘅「燕之家」董事總經理白富鴻話，現時係佢哋嘅生意淡季，加上六成燕窩生意都係由內地人消費，所以佢就搞搞新意思，研究推出優惠，等平時食唔到燕窩嘅市民可以一嘗燕窩嘅滋味。
卓妮