餐館垃圾站盜水洗生蠔
【專案組報道】食環署監管乏力，元朗一個垃圾收集站變成「無掩雞籠」，多名食肆職員盜用公家水，在臭氣熏天、污水遍地的垃圾站清洗生蠔，然後煮給客人享用，惟食環署竟然睇唔到，聲稱多次調查都無發現。立法會議員李華明直斥署方失職，更擔心事件涉及非法收受利益，促署方徹查。
本報發現，元朗仁樂坊垃圾收集站，被盜用食水為作清洗食物。上月初，記者直擊兩名食肆員工，到該垃圾收集站用「公家水」清洗食材，兩人推着兩大箱生蠔停在垃圾收集站前，再蹲在滿地污水的路上撬開蠔殼，又將生蠔倒在路面，數目多達數百隻。
遍地污水散發餿臭味
期間，其中一人走進垃圾收集站，開大水喉沖洗生蠔，完成工序後離開。由於該處衞生環境惡劣，不時傳來餿臭味，食客擔心會病從口入，不敢再光顧附近食肆。
「喺垃圾站洗蠔係唔想整污糟廚房後巷，我哋咁做只有一次，以後都唔會啦。」食肆負責人鍾先生直認曾於上址違法清洗生蠔。他解釋：「我哋唔想整污糟後巷，先去垃圾站洗。」食環署發言人表示，未發現有公眾人士盜用自來水，但已將供水系統上鎖，如有發現，會先警告，無效會報警。