要數香港旅遊景點，數來數去離不開海洋公園、迪士尼樂園以及大嶼山昂坪。假如你去到昂坪，你當然會見到天壇大佛呀，寶蓮禪寺呀，Ngon Ping Sam Luk Ling……唔係，係昂坪纜車至啱。之不過咁，大家可能忽略咗一個奇景，呢個奇景可能係世界上最獨特嘅。
話說位於昂坪蓮坪路嘅昂坪廣場去年八月開放，設有古色古香嘅牌樓、地壇以及亭園，配合藥師十二神將石像同埋蓮花燈，非常之咁美輪美奐。就喺呢個美不勝收嘅環境裏面，奇景出現嘞，居然有一碌又一碌燈柱遮擋景觀，簡直大殺風景！
身為香港人嘅你，應該對於「屏風樓」唔會陌生，估唔到連旅遊景點都有「屏風燈」，你話係咪獨特奇景？有一位陳小姐，早前去到昂坪廣場散散心，諗住用相機拍攝醉人風光啦，點知佢喺「南天佛國」牌樓前面取景，發現大約十九米高嘅牌樓竟然被一支高度相若嘅街燈好似頂心杉咁頂住。陳小姐為求拍得牌樓全貌，不惜左閃右避，甚至高攝低炒，可惜依然無法避免燈柱入鏡。
除咗燈柱大殺風景，牌樓附近仲有大量路牌，其中一塊「全日廿四小時不准停車」兜口兜面遮住牌樓，初到貴境嘅遊客隨時誤會香港人好鬼死鍾意喺牌樓裏面停車。
呢一位陳小姐絕對係熱愛香港嘅好市民，眼見雜物篤口篤鼻，橫七豎八有礙觀瞻，於是向路政署反映，要求將阻住地球轉嘅燈柱同路牌移開少少。斷估呢個有益有建設性嘅提議冇人反對啩，哈，死得佢吖，估錯晒喎，路政署嘅回覆激到當事人啼笑皆非。官老爺話喎，燈柱同路牌唔係唔可以移開，不過相關嘅工程費用要由提出建議嘅人支付。
開講都有話，好狗唔攔路，照咁講路政署一定唔係好狗，否則冇可能寸步不移甘心淪為攔路官。喂，叫你移開燈柱同路牌少少啫，又唔係拆你祠堂，咁都敷衍塞責要求市民出錢搞掂，攔路攔到好狗不如！
之但係話分兩頭，路政署嘅官腔態度雖然略嫌與民為敵，但係不失為一條永遠立於不敗之地嘅蠱惑陰招，其他官僚大可有樣學樣。譬如咁講吖，有人不滿財政司司長曾俊華嘅拙劣表現頂心頂肺，推出一份超廢預算案搞到天怒人怨，淨係企喺鏡頭面前已經有礙觀瞻，要求將佢搬離財爺寶座，政府同樣可以話，移動曾俊華唔係話唔得，不過相關嘅行政費用要由提出建議嘅人支付。
計功夫茶話齋，路政署署長劉家強最好醒醒定定，萬一有人真係願意出錢移動閣下尊貴盛臀，咁就醜死怪咯！