立法會尋日休會辯論針對公職人員嘅暴力行為，好多議員都有提到大熱嘅粟米斑塊飯，但唔知點解好多人都講錯個飯名，認真奇怪。
提出休會辯論嘅經濟動力林健鋒，發言時就將粟米斑塊飯講成粟米石斑飯，民主黨主席何俊仁（鐵頭仁）仲犀利，將斑塊講成肉斑，究竟乜嘢係肉斑，就真係無人知嘞。前日有份拎住盒粟米斑塊飯向煲呔曾抗議嘅社民連梁國雄竟然都講錯做粟米石斑飯。莫非粟米斑塊飯個名好難記？
講番煲呔曾疑似畀人撞傷單嘢，鐵頭仁尋日就話，自己都年輕過，三、四十年前更加試過上街示威同人衝撞，但當年因為體態輕盈、身手靈活所以冇畀人捉到喎，反而身邊一位身高五呎九吋嘅示威者就畀人拉咗，做咗佢嘅替死鬼。