政情：黑英批孫公地理差
新學年中一適齡學童人口僅下跌四千七百人，但中一學額就隨時因減班而削減六千八百多個，學額「減過龍」或將令部分地區學生被迫跨區上學。不過，教育局局長孫明揚前日竟然話學生跨區上學唔係問題，又話中西區跨區去灣仔，搭港鐵只係十幾二十分鐘，結果畀人鬧爆，連英皇書院校友兼前天文台台長林超英都狠批孫公唔識地理。
林超英近期因為縮班問題同孫公撐到行，尋日佢再就學生被迫跨區上學問題喺網誌撰文，狠評孫公唔識香港地理，佢話「港鐵港島線的西端終點站是上環，港鐵並不服務西區的西營盤、石塘咀、堅尼地城，住喺呢度嘅同學要搭電車或巴士往灣仔或東區」，更質疑「高高在上的官員怎會知道基層的實況」，意指孫公閂埋門做事。
林超英又點出，「原區就讀」係當年教育當局經過長期積累經驗後形成嘅政策，但今日一個忽然擔任教育政策嘅官員，輕描淡寫講咗一句：「跨區上學不是問題」，就將前人辛苦經營嘅政策銷毀於無形！