政情：KK壞手機甩底捱轟
手機係現今社會嘅必需品，壞手機就成為港人最大煩惱之一。工聯會黨團召集人黃國健（ＫＫ）尋日朝早起身，發現手機自動熄機，之後再開唔番，無人聯絡到佢，幾近與世隔絕，仲因而惹禍，被電台節目主持人痛罵一頓，含冤莫白。
預算案風波日日有新發展，ＫＫ本來答應電台同電視台進行電話訪問，但手機壞咗，電台同電視台聯絡唔到佢，最慘係就算即時去買部新手機，用番舊手機張卡一樣啟動唔到，內藏嘅電話號碼無法顯現，想主動「報案」都唔得。結果，成朝早都搵唔到ＫＫ嘅電台節目主持人，喺大氣電波批評ＫＫ玩失蹤，唔敢面對群眾。
ＫＫ花錢換手機，荷包已經受傷，仲要被人鬧，今次真係啞子食黃連，有苦自己知。ＫＫ無奈話，自己一向牙齒當金使，今次「甩底」事件，全因壞手機累事，佢特別託我哋向各界朋友轉告，如果尋日聯絡唔到佢，絕非佢為人高竇或者做無尾飛陀。