政情：陳淑莊義賣企鵝裙
民建聯副主席張國鈞年前喺電台節目發表嘅「北極有企鵝論」畀各界笑到臉黃，話佢南北不分，咁啱嗰段時間立法會議員陳淑莊（Tanya）喺自由黨方剛旗下店舖Jessica買咗條黑白色連身裙，因而畀人話佢有心暗寸張國鈞。不過，時至今日，Tanya重申買呢條裙並無特別意思，只係貪靚貪特別，尋日佢仲捐咗條裙畀非牟利團體義賣籌款。
聖雅各福群會將會舉行Green Ladies慈善舊衣義賣活動，Tanya件黑白企鵝裙成為焦點之一。Tanya話，佢好捨得買衫，但就唔捨得丟衫，所以搞到屋企嘅衣服堆積如山，但堆堆吓始終要解決，經過極大掙扎後，決定將部分衣服捐出嚟做慈善，除咗件企鵝裙外，佢仲捐咗媽咪送畀佢嘅一件粉紅色衫，希望籌得嘅善款能夠幫助有需要人士。
今次慈善舊衣義賣活動將於本月五及六日舉行，部分二手衣服會平價出售，所有賣得善款會為中年婦女提供就業及培訓機會，讓婦女們自力更生。