政情：立會如虎口保安阿頭劈炮
近期香港刮起一股試用期內辭職嘅怪風，好似萬眾矚目嘅西九文化區管理局，成立三年唔夠走咗兩位高層。呢股怪風近日吹到立法會頭上，上任唔夠三個月嘅總保安主任黃培昌，上月底以家庭及個人理由辭職。今次總保安主任突然跳船，睇怕同當日西九管理局行政總裁謝卓飛因病辭職一樣或有內情，莫非佢被立法會議員嘅暴力問題嚇怕？
未滿半年試用期
我哋喺去年十一月講過，工作愈來愈難頂嘅立法會保安一度怨氣沖天，幾近爆發工業行動，但隨着屬警司級人物嘅黃培昌喺十二月上任，秘書處再增添人手後，怨氣稍為退減。可惜好景不常，黃培昌返咗新工一個月多啲就向秘書處遞信辭職，秘書處話鑑於佢未滿六個月試用期，所以只需要一個月通知就可以執包袱，要臨急請人好頭痕。
據聞黃培昌突然跳船，係有感立法會新大樓工作繁重，遠比佢想像中厲害。其實當初秘書處請佢返嚟嘅重任，就係搞掂好新大樓嘅保安工作，可能新大樓嘅搬遷不容有失，所以對佢構成唔少壓力。特區政府無能，搞到民怨沸騰，議員為選票乜都肯制，包括在會議廳內向官員掟嘢，真假香蕉、公仔、食物、膠樽、陰司紙等物品乜都出齊，保安員為保護官員經常無辜受傷。
另有傳聞話，黃培昌私下感慨打立法會份工犧牲唔少，為咗立法會嗰份九萬元月薪，因而犧牲咗佢每月四萬多元嘅長糧，故此最後選擇提早走人。消息仲話，黃培昌當差時嘅戰績包括籌備應付○六年世貿部長級會議期間示威策略，立法會新大樓嘅工作對佢來說根本係小菜一碟，加上秘書處曾經花唔少嘴頭游說佢留低，結果無功而還，因此估計佢極速走人另有原因。
當然以上幾點純屬傳聞，但秘書處好頭痕就係事實。秘書處回覆我哋話，預期市場上較難再搵到合適人選，即使搵到都要花近半年時間處理好手續兼適應環境，但立法會搬遷在即，現階段會暫時請一位富經驗、快將退休嘅高級警務人員做兼職保安顧問頂檔，待搬遷後再作打算。月薪九萬元絕對唔係低人工，唔通請人真係咁難？市道真係好得咁緊要？