中環出更：李明逵為沈祖堯出「煮」意
前中大校長劉遵義有道拿手煎牛扒秘技，但現任校長沈祖堯向來揸醫生聽筒多過揸鑊鏟，佢於是搵咗識煮又識食嘅中大校董兼校友、前警務處一哥李明逵教番兩招，學番味名菜看門口。沈祖堯尋日就請咗李明逵到中大職員飯堂「雲起軒」獻技，表演煎餃子同烚餃子，李明逵仲孭埋個私家平底鑊去中大，可謂誠意十足。
李明逵自稱包餃子由細包到大，當然煮餃子都難唔到佢，煮到咁上下，佢徒手拿起鑊中熱辣辣嘅餃子，睇吓個底煎得靚唔靚。李明逵以前揸開槍就話唔怕熱，但對於要好好保護雙手為病人醫病嘅沈祖堯就有啲難度，見阿Sir唔錫手教路，佢都打破心理關口照跟住做，仲拍心口負責睇火，認真尊師重道。
其實李明逵尋日早上十點就現身中大，一個多小時就包咗二百隻餃子饗中大教職員，佢完全無呻過辛苦，活動完結後仲主動孭番隻私家鑊離開，佢笑笑口話：「留低隻鑊喺人哋學校就唔好啦！」佢咁有誠意，難怪佢走嗰陣，教職員排咗條人龍要同佢影相留念啦！
暗示煲呔曾被撞係小事？
李明逵現時享受緊退休生活，除咗煮飯、打波、瞓覺之外，仲做義工，培訓內地管理層級公務員，教佢哋處理大型事件及危機管理。前日煲呔曾畀人撞到心口隱隱作痛，係咪有保安漏洞呢？李明逵隨即反問卓妮有關事件算唔算大件事，仲話對傳媒嚟講先係大事啫！莫非佢暗寸煲呔曾被撞係小事一宗？不過，李自言已退休五年，所以單嘢唔關佢事喎。一哥嘅危機處理果然係揮灑自如。