中環出更：人大政協上京晒派頭

大隊約好齊出發，坐中午十二點半班機，近三十位人大及政協，朝早十點半就抵達機場VIP入口check in。上京嘅衣着打扮，每年都成為兩會焦點。合和實業主席胡應湘太太胡郭秀萍雖然係陪老公開會，但打扮絕不求其，拎Chanel手袋，大方又得體。鍾情法國名牌LEONARD嘅健康快車創會主席方黃吉雯，連上京都着呢個牌子，穿起黑色LEONARD大褸，襯埋Gucci黑色大袋，好有女強人風範。

備紅酒茅台款客

LV袋最多捧場客，「美容教主」鄭明明拎LV Speedy，全國政協委員朱蓮芬就揀LV Vernis，福建幫頭領盧文端都係LV粉絲，左手拎LV巨型旅行袋，右手推住「行李箱王」德國RIMOWA旅行篋，呢款篋以鋁金屬製成，出晒名輕身，裝多幾件大褸都唔怕行李超重，難怪深得荷里活明星追捧。

四箱Buzet紅酒空運上京款客。

盧文端（右）又拎LV，又推住RIMOWA旅行篋，裝備唔嘢小。 （何偉鴻攝）

卓妮發現，向來收藏唔少名酒嘅盧文端，仲捧咗四大箱法國著名紅酒Buzet上京，呢隻酒以口味醇厚見稱；同屬福建幫兄弟嘅施子清都唔執輸，空運一大箱貴州茅台宴客。茅台喺內地極之受歡迎，兩會期間宴會多，開番幾支茅台款客，夠晒面子。

胡應湘（左起）、蔣麗芸及胡郭秀萍大包小包齊上京。（溫國佳攝）	方黃吉雯着Leonard大褸，拎Gucci袋開會，一派女強人風範。	鄭明明帶定幾篋禦寒厚衫，當然唔少得LV手袋喇。

卓妮轉頭撞見中華總商會會長蔡冠深太太蔡關穎琴，佢都上京，但就唔係陪老公，而係公幹至真。蔡太出門都掛住仔女，出差期間，搵細妹嚟佢屋企幫仔女溫書，認真廿四孝。

卓妮