政務司司長唐英年又瘀爆嘞！舊年以健康理由突然劈炮嘅前西九管理局行政總裁謝卓飛，時隔未夠兩個月就蟬飛別枝，另有高就，擺明有蠱惑。當時被指「漏招」嘅唐唐，今鋪睇怕搽面懵膏都未夠，直頭要搵窿捐至得咯。
謝卓飛有乜嘢高就？巴閉咯，英國文化協會藝術總監，五月初履新。呢個洋和尚都算多橋，嚟香港做咗五個月，話就話返英倫過聖誕，臨走前仲暢談鴻圖大計添，誰不知去如黃鶴，連出三封醫生信越洋力證自己健康唔妥，唔適合返香港，要即時終止合約。點知收足人工之後，唔夠兩個月就「起死回生」，食咗第二家茶飯，擺明係跣港府一鑊，跣香港人一鑊！
最搞笑嘅係，英國文化協會網頁仲列明謝卓飛曾出任西九行政總裁，真係夠晒諷刺。唔怪得有人懷疑，謝卓飛話唔定一早有晒計劃，只不過將香港當跳板，搵西九過橋㗎咋。
無論點都好，家陣謝卓飛龍精虎猛，完全唔似有病，成件事愈睇愈有蠱惑，證明呢個人既冇承擔，更冇誠信。正如立法會議員話齋，直頭有被欺騙嘅感覺，問題係，唔知係謝卓飛騙咗西九管理局，定係西九管理局騙咗市民，睇嚟身為西九管理局主席嘅唐唐有責任向市民交代。
唐唐話喎，前日至知道謝卓飛嘅新動向，而西九發言人就話唔會評論。唉，呢鋪正一啞巴吃黃連，除咗硬食，仲有乜嘢好噏吖。如果話謝卓飛有心欺騙，當局畀佢跣鑊甘，只能怨自己戇居兼冇腦，自食其果，與人無尤。最無辜嘅係香港市民，無端端被人出賣，真係冤哉枉也。
講開又講，當初西九全球招聘行政總裁，大拿拿幾百萬年薪請個洋和尚返嚟，居然連驗身都慳番，卒之撞晒大板。謝卓飛櫈都未坐熱就越洋請辭，先走後奏，當局畀人殺個措手不及，直頭瘀到痹。
更瘀嘅係，面對「漏招」批評，由唐唐到一眾西九高層異口同聲，誓神劈願話洋和尚真係有病，至於乜嘢病搞到要即時走人，當局就攞「私隱」做擋箭牌。結果呢，謝卓飛「病」咗兩個月就龍精虎猛，仲鬼咁風光，當堂摑咗唐唐一巴。
話時話吖，列入煲呔曾「十大建設」嘅西九文化區，十幾年一直喺度養草，文化藝術就冇嘞，「換人行為藝術」就睇到人眼都花，換人仲密過日本換首相，近兩年有四分之一員工流失。而使公帑更加唔肉赤，淨係文化區嘅設計同顧問費就用咗二億三千萬，被網民評為過去一年最浪費公帑事件「亞軍」。
弊在西九管理局並冇吸取教訓，近排登廣告全球招聘行政總裁繼任人，條款同以前完全一樣，只係話會考慮為新任總裁提供自願性免費驗身，簡直不可理喻。西九管理局請人兒戲，管理兒戲，第日文化區起好，分分鐘更加兒戲，你話市民仲點會有信心吖！
可一不可再，香港人畀謝卓飛明跣一鑊，絕對唔可以再有第二鑊，計功夫茶話齋，西九管理局必須畀市民一個清楚交代，如果有人出蠱惑，該回水嘅回水，該追討嘅追討，唔可以就咁算數！