政情：高官落區會送別發叔
鄉議局主席劉皇發因為屯門鄉事委員會修章，連任屯門鄉委會主席無望，連帶佢嘅屯門區議會當然議員及區議會主席身份一併無埋。話咁快嚟緊周二（三月一日）就係發叔最後一次主持屯門區議會大會，除咗正如我哋預告所講發叔會發表離任感人演說外，當日仲有三個署長級官員不約而同出席與議員會面，真係夾都無咁啱，睇嚟借啲意送別發叔居多。
周二出席屯門區議會嘅官員，打頭陣係人稱「騰雞美華」嘅民政事務總署署長陳甘美華，然後輪到上任無耐嘅勞工處處長卓永興及食環署署長梁卓文。區議員經常批評高官唔落區，即使肯落區都一個起、兩個止，但一次過三個高官同日落區就好少見嘞，尤其係民政事務局局長曾德成，今屆區議會只喺○八及○九年初落過屯門區議會，去年開始連影都無埋。
雖然班區議員經常笑騰雞美華做事「騰雞」，但佢為人卻有情有義，同發叔更加交情非淺，難得德成局長唔蒲頭，佢一馬當先落區見吓班區議員，唔使問梗係順便送別發叔啦。據講發叔都好頭好尾，當日中午喺旗下屯門間酒樓設宴，請班議員同出席高官食番餐。