政情：博愛高層藉中藥養生
香港人生活緊張忙碌，尤其是城中名人日日趕幾場，要時刻保持容光煥發一啲都唔容易。不過，博愛醫院一眾高層個個都有一、兩條私家養生藥方，而且不約而同係中醫中藥嘅擁躉，難怪前日第一屆「博愛醫院中醫中藥保健安康日」喺觀塘康寧道遊樂場揭幕時，個個踴躍撐場。
主席黃帆風嘅太太、囡囡同外孫現身支持，陣容最龐大。講起養生之道，佢自爆一星期飲兩次自家煲嘅靈芝、果皮、蜜棗水，可以清腸胃、除痰，仲keep住皮膚靚靚添。秘訣係朝早空肚飲，佢飲咗十幾年，難怪面色咁紅潤。博愛總理彭少衍就日日啪兩粒蟲草同靈芝孢子膠囊，貪佢夠滋補養氣。候任主席湯修齊雖然冇佢哋咁滋陰，但一有傷風感冒就睇中醫，佢仲係針灸嘅擁躉，唔使講，梗係幫襯博愛嘅中醫診所啦。
香港中藥業協會有份協辦今次活動，主席兼百成堂集團第三代傳人李應生當日都喺度。佢嘅養生妙方係將花旗參、石斛同田七磨成粉，然後取兩茶匙溝大半杯水，每日飲一次，功效係降血脂、清肝火兼提神。